Чтение онлайн

Молитва пятая

Боже милостивый и Небесный Отче! Помилуй дети наша (имена), о нихже смиренно молим Ти ся и ихже Твоему попечению и защите предаем. Вложи в сердца их веру крепку, научи благоговети пред Тобою и сподоби их крепце любити Тя, Создателя нашего и Спасителя. Настави их, Боже, на путь истины и доброделания, да во всех делех своих прославят имя Твое. Научи их жити благочестно и добродетельно, да будут не именем токмо, но и жизнию христианы, и Отечеству полезны.

Даждь им здравие душевное и телесное и благопоспешение в трудех. Избави их от ловления диаволя, от множества соблазнов, от страстей скверных и от всяких человек нечестивых и лукавых. Молитвами Пречистыя Богородицы и всех святых приведи их к тихому пристанищу вечнаго Твоего Царствия, да выну со всеми праведники благодарят Тя со Единородным Твоим Сыном и Животворящим Твоим Духом. Аминь.

Песнь Пресвятой Богородице

О Пресвятая и преблагословенная Дево Богородице, Мати сладчайшаго Господа нашего Иисуса Христа, Царице небеси и земли, всемилостивая заступнице рода христианскаго, прибежище и спасение притекающих к Тебе! Припадаю и покланяюся Тебе пред святою иконою Твоею и смиренно молю Тя: спаси и сохрани под кровом Твоим чад моих (имена), огради их от глада, губительства, труса, потопа, огня, меча, нашествия иноплеменных, междоусобныя брани, от всех враг видимых и невидимых, от всякия беды, болезни, напасти и внезапныя смерти.

О Царице Небесная, на всяком месте и на всякое время буди им стена необоримая и заступление крепкое. Яко Свет невечерний от чрева Твоего возсиявшая, озари души их, Пречистая, и отжени всякую мглу от сердец их. Даруй им умиление, смирение, покаяние, чистоту помышлений и дух сокрушения. Покрый ризою пренепорочнаго Материнства Твоего, воспитай, уцеломудри, отверзи ум к восприятию всякаго полезнаго учения, соблюди во страсе Божием и к послушанию родителем настави. Буди им непрестанная теплая молитвенница и ходатаица к рождшемуся от Тебе Господу и Богу нашему Иисусу Христу, умоли Его, да дарует им вся полезная ко спасению их. Много бо может Матерняя Твоя молитва на умоление Владыки; сего ради Твоим ходатайством и заступлением избави их от мытарств воздушных князей века сего, и на страшнем судищи Христове сподоби их стати одесную Сына Твоего, и наследники вечных благ сотвори.

О Всеблагая! Под Твою милость прибегаю, Богородице Дево, вручаю чад моих (имена) Твоим святым молитвам и Матернему смотрению Твоему, яко Ты еси, едина чистая и благословенная, Божественный покров рабом Твоим, да величаем Тя, всеблагомощная Госпоже Богородительнице, и славим воплощшагося от Тебе Христа Бога нашего, Емуже подобает всякая слава, честь и поклонение со безначальным Его Отцем и с Пресвятым и благим и животворящим Его Духом, ныне и присно, и во веки веков. Аминь.

Молитва

О Пресвятая Дево Владычице Богородице, спаси и сохрани под кровом твоим чад моих (имена), всех отроков, отроковиц и младенец, крещеных и еще безыменных, во чреве матереи носимых. Покрый их ризою Материнства Твоего, соблюди во страсе Божии и послушании родителем, умоли Господа моего и Сына Твоего, да дарует им вся полезная ко спасению. Вручаю их Материнскому смотрению Твоему, яко Ты еси Божественный Покров рабом Твоим.

Святый Ангеле, Хранителю чада моего (имя), покрый его покровом твоим от стрел демона, от глаз обольстителя и охраняй сердце его во ангельстей чистоте. Аминь.

Молитва

Господи, Ты един вся веси и вся можеши и всем хощеши спастися и в разум истины приити. Вразуми чадо мое (имя) познанием истины Твоей и воли Твоея святыя, укрепи его ходити по заповедем Твоим и мене, грешную, помилуй. Аминь.

Святитель Иулиан епископ Кеноманийский (I в.) – великий молитвенник о грудных детях. К его молитвам прибегают, когда дети болеют, когда у матери не хватает грудного молока, когда родители не могут зачать ребенка, когда женщина загубила чадо во чреве своем.

Существует мнение, что он – одно лицо с Симоном прокаженным, в доме которого одно время жил Иисус Христос (Мк. 14, 3). Симон в крещении получил имя Иулиан. Апостол Петр послал святого Иулиана проповедовать Евангелие. Иулиан прибыл в Кеноманию и начал свою проповедь среди язычников, которая сопровождалась великими чудесами. Святой Иулиан усердно заботился о духовном просвещении своей паствы. Исцеляя телесные недуги, святой Иулиан исцелял и души, обращая людей в христианство. Он обратил к вере местного князя и явил из сухого места источник воды. Святитель молитвой лечил разные болезни. Глубоко сочувствуя горю родителей, святой Иулиан своей молитвой испрашивал у Бога возвращение их умерших детей к жизни.

Тропарь, глас 4

Правило веры и образ кротости воздержания учителя яви тя стаду твоему яже вещей истина; сего ради стяжал еси смирением высокая, нищетою богатая, отче священноначальниче Иулиане, моли Христа Бога спастися душам нашим.

Кондак, глас 2

Божественный гром, труба духовная, веры насадителю и отсекателю ересей, Троицы угодниче, великий святителю Иулиане, со Ангелы предстоя присно, моли непрестанно о всех нас.

Молитва первая

Святителю отче Иулиане, нетлением честных мощей твоих и многими благодеяниями, чудесно содеянными и содеваемыми тобою с верою к тебе притекающим, уверившиеся, яко имаши велию благодать у Господа Бога нашего, всесмиренно приподаем вси и молимся тебе: Моли о нас Христа Бога нашего, да ниспослет всем, чтущим святую память твою и усердно к тебе прибегающим, богатыя милости Своя: да утвердит во святей Своей Православной Церкви живый дух правыя веры и благочестия, дух ведения и любве, дух мира и радости о Духе Святе, да вси члены ея, чисты от мирских искушений и плотских похотей и злаго действия злых духов, духом и истиною поклоняются Ему и усердно пекутся о соблюдении заповедей Его ко спасению душ своих. Пастырем ея да даст святую ревность попечения о спасении людей, им вверенных, да неверующих просветят, неведущих наставят, сомневающихся вразумят и удостоверят, отпадших от православныя Церкве обратят в святыя недра ея, верующих соблюдут в вере, грешных подвигнут к покаянию, кающихся утешат и укрепят в исправлении жизни, раскаивающихся и исправившихся утвердят в святости жизни: и тако всех ведут указанным от Него путем в уготованное вечное царство Его. Ей святителю Божий, да устроиши молитвами твоими вся благая душам и телесам нашим: да и мы прославим в душах и телесех наших Господа и Бога нашего, Иисуса Христа, Емуже со Отцем и Святым Духом слава и держава во веки веков. Аминь.

Молитва вторая

О пречестная и священная главо и благодати Святаго Духа исполненная, Спасово со Отцем обиталище, великий архиерее, теплый наш заступниче, святителю Иулиане, предстоя у Престола всех Царя и наслаждаяся света единосущныя Троицы и херувимски со Ангелы возглашая песнь трисвятую, великое же и неизследованное дерзновение имея ко всемилостивому Владыце, моли спастися паствы Христовы людем, благостояние святых церквей утверди: архиереи благолепием святительства украси, монашествующыя к подвигом добраго течения укрепи, царствующий град и вся грады и страны добре сохрани, и веру святую непорочну соблюсти умоли, мир весь предстательством твоим умири, от глада и пагубы избави ны, и от нападения иноплеменных сохрани, старыя утеши, юныя настави, безумныя умудри, вдовицы помилуй, сироты заступи, младенцы возрасти, пленных возврати, немощствующыя и молящияся тебе от всех напастей и бед ходатайством твоим свободи: моли о нас Всещедраго и Человеколюбиваго Христа Бога нашего, да и в день Страшнаго Пришествия Его от шуияго стояния избавит нас, и радости святых причастники сотворит со всеми святыми во веки веков. Аминь.