Чтение онлайн

Боже Спасителю наш, изволивый под сень Закхееву внити и спасение тому и всему дому того бывый, Сам и ныне зде жити восхотевшия, и нами недостойными мольбы Тебе и моления приносящия, от всякаго вреда соблюди невредимы, благословляя тех зде жилище, и ненаветен тех живот сохраняяй, яко подобает Тебе всякая слава, честь и поклонение со Безначальным Твоим Отцем и Пресвятым и Благим и Животворящим Твоим Духом, ныне и присно и во веки веков. Аминь.

Господи Боже спасения нашего, Сыне Бога живаго, на Херувимех носимый, превыше сый всякаго Начала и Власти, и Силы, и Господства, Ты еси велий и страшный над всеми сущими окрест Тебе, Ты еси сотворивый землю в крепости Твоей, и исправивый вселенную в премудрости Твоей, трясый поднебесную от оснований, столпы же ея неподвижны, глаголяй солнцу, и не возсияет, звезды же запечатлеяй, запрещаяй морю, и изсушаяй е, егоже ярость тает начала и власти, и камение сотрошася от Тебе. Врата медная стерл еси, и вереи железныя сломил еси: крепкаго связал еси, и сосуды его раздрал еси, мучителя крестом Твоим низложил еси, и змиа удицею вочеловечения Твоего привлекл еси, и узами мрака в тартаре посадив, связал еси. Сам убо, Господи, отжени и в бегство претвори всякое диавольское действо, и всякое сатанинское нахождение, всякий навет сопротивныя и належащия силы от крова сего, и от одержимых от него, и от обходящих под ним; вся сущия во дому сем сохрани, избавляя их от страха нощнаго, и стрелы, летящия во дни, от вещи, во тме преходящия, от сряща и демона полуденнаго. Яко Ты еси Боже утверждение мое, крепкий обладатель, князь мира, Отец будущаго века, и Царство Твое – Царство вечное, и Тебе единаго есть царство и сила и слава, со Отцем и Святым Духом, ныне и присно и во веки веков. Аминь.

Боже сил, Царю царствующих и Господи господствующих! В Твоей руце сердце царево и власть всея земли. Ты посаждаеши царей на престолы их и глаголеши о них: «Мною царие царствуют, не прикасайтеся убо помазанным Моим». Призри милостивным оком Твоим на люте страждущую страну нашу, в нейже за беззакония наша зело умножишася нестроения и раздоры, междоусобия и противления царю нашему и властем, от него поставленным. Еще же и мор, и глад, и болезни всякия постигоша ны, и несть мира, несть ослабы, несть успокоения в домех наших, ниже во градех и весех наших. О Всеведущий и Премилосердый, Ты веси беду нашу, зриши озлобления, слышиши рыдания убогих, стенания сирых и вдовиц и гласы неповинных младенцев, во общенуждии страждущих. Ты пощадил еси Ниневию, град великий, исполнен беззакония, ради покаяния его и ради младенец, иже не познаша десницы своея и шуйцы своея; пощади и нас, грешных, умилосердися над отечеством нашим, пощади ради младенец наших, сирых и вдовиц, пред Тобою, о Милосердый, слезы своя проливающих! Видиши, Господи, како людие, имже несть разума, не точию глаголют в сердцах своих «несть Бог», но и проповедуют нам, паче же юношам и девам нашим, малоопытным сущим, учения развращенная, и тщатся отвратити их от пути заповедей Твоих на пути стропотныя и погибельныя. Вся возможна Тебе суть, о Всемогущий Владыко! Якоже убо единым словом Твоим не точию слепых, глухих и немых исцеляеши, но и мертвых воскрешаеши; тако возглаголи и ныне всесильным словом Твоим в сердцах сих сеятелей нечестия, просвети разум их, гордынею омраченный, пробуди совесть их, суетными мудрованьми, завистию и страстьми пагубными усыпленную, обрати волю их к исполнению животворящих Твоих заповедей, да и тии познают, коль сладка суть словеса Твоя сердцу человеческому, и коль иго Твое благо и бремя Твое легко есть. Да прославится убо имя Твое, Господи Спасителю наш, и в сих погибающих братиях наших, и да посрамится лукавый супостат наш диавол, сеяй плевелы на ниве Твоей, яже есть Церковь Твоя святая! О Господи, Боже Милосердый, Боже Премудрый, Боже Всемогущий! Паки и паки припадаем Тебе и слезно в покаянии и умилении сердца вопием: согрешихом, беззаконновахом, неправдовахом пред Тобою, и воистинну праведно по делом нашим наказуеми есмы. Помяни убо веру и смирение отец наших, услыши теплая моления святых угодников Твоих, в земли нашей просиявших, помилуй землю Русскую, утоли вся крамолы, раздоры и нестроения, умири сердца, страстьми обуреваемая, сохрани возлюбленнаго Тобою раба Твоего, правителя нашего, огради его правдою и миром, возглаголи в сердце его благая и мирная о Церкви Твоей и о людех Твоих, посли ему советников, мудростию исполненных и волю его свято исполняющих, соблюди суды его немздоимны и нелицеприятны, вдохни мужество в сердца стоящих на страже благоустроения государственная, а имже судил еси за веру и отечество во дни скорби сея душу свою положити, тем прости вся согрешения их, венцы мученическими венчай во Царствии Твоем. Всех же нас озари светом закона Твоего евангельскаго, возгрей сердца наша теплотою благодати Твоея, утверди волю нашу в воли Твоей, да якоже древле, тако и ныне на земли нашей, и в нас, и чрез нас прославится всесвятое имя Твое, Отца и Сына и Святаго Духа. Аминь.

Господи Боже наш, послушавый Моисея, простерша к Тебе руце, и люди Израилевы укрепивый на амалика, ополчивый Иисуса Навина на брань и повелевый солнцу стати. Ты и ныне, Владыко Господи, услыши нас, молящихся Тебе: укрепи силою Твоею правителя нашего, благослови его дела, умножи славу его победами над враги, утверди всесильною Твоею десницею страну его, сохрани воинство его, посли Ангела Твоего, укрепляюща их, подаждь им вся, яже ко спасению прошения, брани умири и мир утверди. Посли, Господи, невидимо десницу Твою, рабы Твоя заступающую во всех, а имже судил еси положити на брани души своя за веру и отечество, тем прости согрешения их, и в день праведнаго воздаяния Твоего воздай венцы нетления, яко Твоя держава, царство и сила, от Тебе помощь вси приемлем, на Тя уповаем, и Тебе славу возсылаем, Отцу и Сыну и Святому Духу, ныне и присно и во веки веков. Аминь.

Спасителю мой! Ты положил за нас душу Свою, дабы спасти нас; Ты заповедал и нам полагать души свои за други наша и за ближних наших. Радостно иду я исполнити святую волю Твою и положити жизнь свою за отечество. Вооружи мя крепостию и мужеством на одоление врагов наших, и даруй ми умрети со твердою верою и надеждою вечныя блаженныя жизни во Царствии Твоем.

Мати Божия! Сохрани мя под покровом Твоим. Аминь.

Да воскреснет Бог, и расточатся врази Его, и да бежат от лица Его ненавидящии Его. Яко исчезает дым, да исчезнут; яко тает воск от лица огня, тако да погибнут грешницы от лица Божия; а праведницы да возвеселятся. Господь Бог благословен, поспешит нам Бог спасений наших. Дивен Бог во святых Своих, Бог Израилев, Той даст силу и державу людем Своим. Аминь.

Всевышний Боже, Владыко и Содетелю всея твари, наполняяй вся величеством Твоим и содержай силою Твоею! Тебе, Вседаровитому Господу нашему, мы, недостойнии, благодарение приносим, яко не отвращаешися нас беззаконий ради наших, но паче предваряеши ны щедротами Твоими. Ты ко избавлению нашему послал еси Единороднаго Твоего Сына, и благовестил безмерное Твое к роду человеческому снисхождение. Яко хотением хощеши, и ожидаеши, еже обратитися нам к Тебе и спасенными быти. Ты, снисходя к немощи нашего естества, укрепляеши нас всесильною Святаго Твоего Духа благодатию, утешаеши спасительною верою и совершенною надеждою вечных благ и, руководствуя избранных Твоих в Горний Сион, соблюдаеши яко зеницу ока. Исповедуем, Господи, великое Твое и безприкладное человеколюбие и милосердие. Но, видяще многих поползновения, прилежно Тя, Всеблагий Господи, молим: призри на Церковь Твою, и виждь, яко Твое спасительное благовестие аще и радостно прияхом, но терние суеты и страстей творит оное в некиих малоплодно, в некиих же и безплодно, и по умножению беззаконий овии ересьми, овии расколом противящеся евангельской Твоей истине, отступают от достояния Твоего, отревают Твою благодать и повергают себе суду Твоего пресвятаго слова. Премилосердый и Всесильный, не до конца гневайся, Господи! Буди милостив, молит Тя Твоя Церковь, представляющи Тебе, Начальника и Совершителя спасения нашего Иисуса Христа, буди милостив нам, укрепи нас в правоверии силою Твоею, заблуждающим же просвети разумныя очи светом Твоим Божественным, да уразумеют Твою истину; умягчи их ожесточение и отверзи слух, да познают глас Твой и обратятся к Тебе, Спасителю нашему. Исправи, Господи, иных развращение и жизнь, несогласную христианскому благочестию; сотвори, да вси свято и непорочно поживем, и тако спасительная вера укоренится и плодоносна в сердцах наших пребудет. Не отврати лица Твоего от нас, Господи, воздаждь нам радость спасения Твоего; подаждь, Господи, и пастырем Церкве Твоея святую ревность и попечение их о спасении и обращении заблуждающих Духом евангельским раствори; да тако вси руководими достигнем, идеже совершение веры, исполнение надежды и истинная любовь; и тамо с лики честнейших небесных сил прославим Тебе, Господа нашего, Отца и Сына и Святаго Духа, во веки веков. Аминь.

Владыко Господи Боже наш, Единородный Сыне и Слово Отчее, Иже всяк соуз грех наших Твоею страстию растерзавый, Иже дунувый на лица Твоим апостолом и рек им: Приимите Духа Святаго, и ихже аще оставите грехи, оставятся им, ихже аще держите, удержатся. Ты Сам, Владыко, святыми Твоими апостолы даровал еси по времени священнодействующим во святей Твоей церкви на земли оставляти грехи, и вязати и решити всякий соуз неправды, молимся убо и ныне о брате нашем (имя), предстоящем пред Тобою, подаждь ему Твою милость, разреши его соуз греховный, аще что в неведении или небрежении глагола, или от малодушия содела, ведый человеческую немощь, яко Человеколюбец и Благ Владыка, вся вольныя и невольныя грехи прости ему, яко Ты еси милуяй окованныя, возставляяй низверженныя, надеждо ненадеющихся, упокоение падших, и раба Твоего сего свободи от соуза греховнаго, яко прославися Твое всесвятое имя, со Безначальным Твоим Отцем и Святым Духом, ныне и присно и во веки веков. Аминь.

Господи Иисусе Христе, Боже наш, Боже всякаго милосердия и щедрот, Егоже милость безмерна и человеколюбия неизследимая пучина, ко Твоему Величеству припадающе, со страхом и трепетом, яко раби недостойнии, благодарение Твоему благоутробию о Твоих благодеяниих, на рабех Твоих бывших, ныне смиренно приносяще, яко Господа, Владыку и Благодетеля славим, хвалим, благодарим, поем и величаем, и, припадающе, паки благодарим, Твое безмерное и неизреченное милосердие смиренно моляще. Да якоже ныне моления рабов Твоих прияти, и милостивно исполнити сподобил еси, и во предняя в Твоей и искренняго любви и во всех добродетелех преспевающих, Твоя благодеяния всех верных Твоих получити сподоби, Церковь Твою святую, и град сей (или весь сию), от всякаго злаго обстояния избавляя, и мир и безмятежие тем даруя, Тебе, со Безначальным Твоим Отцем и Пресвятым и Благим и Единосущным Твоим Духом, во Единем Существе славимому Богу, всегда благодарение приносити, и преблагая глаголати и воспевати сподобиши. Слава Тебе, Богу, Благодателю нашему, во веки веков. Аминь.

Создателю всех, Боже, семена благословляяй и умножаяй, и к употреблению нашему сия благопотребна творяй; ходатайством Предтечи и Крестителя Иоанна, милостивно внемля молитвам нашим, пчелы сия благословити и освятити Своим благоутробием благоизволи, да обильнее плоды своя приносят, во еже ко храму Твоему и святых олтарей Твоих лепоте и украшению, купно же и нашему употреблению быти им, о Христе Иисусе Господе нашем, Емуже честь и слава, во веки веков. Аминь.

Боже Всемогий, Предвечный, содержаяй горстию всю тварь, обладаяй небом и землею, и всеми, яже на них, всякому же созданию, еже на пользу быти щедро подаяй: умиленно молим Ти ся, Всеблаже, якоже древле израильтяном, землю медом и млеком текущую даровати, в пустыни Иоанна Крестителя Твоего дивиим медом воспитати благоизволил еси: такожде ныне призрения Твоего благоволением к живопитанию нашему, сей пчельник и его улья благослови, умножая преумножи в нем пчелы, и благодатию Твоею я соблюдающи, тучнаго нас меда исполни: да никако сей пчельник созданий Твоих пчельных лишен, но всегда преисполнен соты меда будет: и по премногой благостыни и непобедимей крепости Твоей, да явится неподвижим многими лукавствы, и непоколебим зазорными обаянии, но Твоею всесильною огражден державою, и остенен ополчением, от всякаго коварства волшебнаго сохранен, и всегда в Твоей, Христе, рукояти невредим пребудет. Твое бо есть, еже миловати и спасати ны, Христе Боже наш, и Тебе славу возсылаем, со Отцем и Святым Духом, во веки. Аминь.

Боже, трудом человеческим и бессловесными животными благодействовати ведый, и неизреченным милосердием Твоим семех пчел плоды и дела к нуждам нашим употребляти научивый, смиренно молимся величествию Твоему: пчелы сия благословити изволиши к приобретению человеческому роду умноже я, снабдевая их, препитавая, да кийждо на величество Твое и безмерныя щедроты Твоя уповаяй, в хранении же сих животных труждаяйся, трудов своих обильныя плоды сподобится восприяти и небеснаго благословения исполнится, о Христе Иисусе Господе нашем, Емуже честь и слава во веки веков. Аминь.