Чтение онлайн

В лето 6645 индикта 15. Ожели кто в которое время а то рюшить, или отъиметь, что я урядил князь Никола Святослави с владыкою Нифонтомь, князь, ли или ин кто сильных новогородець, а будеть богу противен и святей Софии.

А се Обонезьскыи ряд: во Олонци 3 гривны, на Свери грив[на], в Юсколе 3 грив[ны], в Тервиничих 3 грив[ны], у Вьюнице грив[на], устье Паши грив{на], у Пахитка на Паши полъгрив[ны], на Кукуеве горе грив[на], у Пермина грив[на], у Кокорка полъгрив[ны], на Масиеге низ Сяси полъгрив[ны], в поезде от всее земли владыце 10 грив[ен], а попу две грив[не], у Липсуевичь полъгрив[ны], у Тоивота грив[на], в Липне полъгрив[ны].

А се Бежичьскыи ряд: в Бежичих 6 грив[ен] и 8 кун, Городецьке полъпяты грив[ны], в Змени 5 грив[ен], Езьске 4 грив[ны] и 8 кун, Рыбаньске грив[на] волжьская, вы Изьске полъгрив[ны] волжьская.

УСТАВНАЯ ГРАМОТА КНЯЗЯ РОСТИСЛАВА 1150 Г.

1. Во имя отца и сына и святаго духа. Бог и святая богородица и отца моего молитва, приведох епископа Смоленску, сдумав с людми своими, по повелению отца своего святого, еже хотев при животе своем сътворити; но есть [з] де первее сего не бывало епископьи, да яз недостойный, грешный, се уст[в]ляю епископью, о немь же епископу быти живу и с клиросом своим, в свои дни и во свое княженье, еже ми бог дал и отчя молитва.

2. А се даю святей Богородици и епископу прощеники, с медом, и с кунами, и с вирою, и с продажами, и не надобе их судити никакому же человеку.

3. И се даю святей Богородици[и] епископу десятину от всех даней Смоленских, что ся в них сходит истых [к]ун, кроме продаже и кроме виры и кроме полюдья: у Вержавлянех у Великих 9 погост, а в тех погостех платит кто ж свою дань и передмер истужници по силе, кто что мога, а в тех погостех а некоторый погибнеть, то ти и десятины убудеть, а в тых погостех во всех сходится дани осмъсот гривен, а передмера сто гривен, а на истужницех сто гривен, то ти из того взяти епископу к святей Богородици сто гривен; а во Врочницех [200?] Гривен, то ти из того взяти епископу 20 гривен; а в Торопчи дани четыриста гривен, а епископу с того взяти 40 гривен; а в Жижци дани 130 гривен, а с того епископу взяти 13 гривен; а в Каспли 100 гривен, а из того епископу взяти 10 гривен; а в Хотшине дани 200 гривен, а из того епископу взяти 20 гривен; а в Жабачеве дани 200 гривен, а из того епископу взяти 20 гривен; а в Вото[р] овичи дани 100 гривен, а из того епископу 10 гривен; а в Шуисцеи да[н]и 80 гривен, а из того епископу 8 гри65 вен; а в Дешнянюх 30 гривен, а из того [е]пископу три гривны; а в Ветьскеи дани 40 гривен, а из того епископу четыри гривны; а на Былеве дани 20 гривен, а и епископу из того 2 гривны; [а] в Бортницех на оной стороне 40 гривен, а из того епископу 4 гривны; [а] в Витрине дани 30 гривен, а из того епископу три гривны; в Жидчичих 10 гривен, [а и] ис того епископу гривна; в Басеи 15 гривен, а и епископу из того полторы гривны; [в] Мирятичех дани 10 гривен, а епископу из того гривна; в Добрятине дани (30] гривен, а епископу из того три гривны; в Добречкове дани 20 гривен, а из того епископу две гривне; в Бобровницех дани 10 гривен, а из того епископу гривна; на Дедогостичех 10 гривен, а из того епископу гривна; а в Зарубе дани 30 гривен, а из того епископу 3 гривны; а в Женни дани 200 гривен у Велицеи, из того святей Богородици и епископу 20 гривен; в Пацини дани 30 гривен, а из того епископу 3 гривны, а в гостинеи дани неведомо, и что ся сойдет, из того святей [Б]огородици и епископу десятина; в Солодовницех 20 гривен, из того святей Богородици [и е]пископу 2 гривны; на Путтине присно платять четыри гривны, Беници 2 гривны, Корчмити полпяты гривны, Дедичи и дань и вира 15 гривен, гость 7 гривен, а из того святей Богородици и епископу три гривны без семи ногат; на Копысе полюдья четыри гривны, а перевоза четыри гривны, а торгового 4 гривны, а корчьмити неведомо, но что ся соидеть, из того десятина святей Богородици; на Прупои 10 гривен, а из того епископу гривна, а в корчмитех не ведати, но что ся соидеть, из того десятина святей Богородици; у Кречюта дани 10 гривен, а святей Богородице и епископу гривна; в Лучине полюдья […] гривны, а мыта и корчмити не ведомо, но что ся снидет, из того епископу десятина; во Оболви гостинная дань, и что ся в ней снидется, из того святей Богородици и епископу десятина; во Исконе дани 40 гривен, а из того святей Богородици и епископу 4 гривны; Суждали Залесская дань, аже воротить Гюгри, а что будеть в ней, из того святей Богородици десятина; у Вержавску в городе три гривны десятины святей Богороди66 ци; в Лодеиницех 10 гривен дани, а из того гривна святей Богородици. И се даю из Торопча от всех рыб, иже идеть ко мне, десятину святей Богородици и епископу; [От] Жизця такоже от всех рыб, иже идеть ко мне, десятина святей Богородици и епископу [ч]то ся наречет области Смоленское, или мала или велика дань, любо княжа, любо княгинина, или чия си хотя, правити десятину святей Богородици, без всякого отпису деяти.

4. Село Дросенское, со изгои и з землею святей Богородици и епископу, и село Ясенское, и з бортником и з землею и с изгои святей Богородици; и се есми дал землю в Погоновичох Моншинскую святей Богородици и епископу; и озера Нимикорская и с сеножатми, и уезд княж, и на Сверковых луках сеножати, и уезд княж, озеро Колодарское, святей Богородици.

5. И се даю на посвет святей Богородици из двора своего, [о]см капии воску и на горе огород с капустником и з женою и з детми, за рекою, тетеревник с женою и з детми святей Богородици и епископу. Бысть мое сотщание к святей Богородици, по повелению святаго отца моего, чтож мога, тож даю.

6. А теж епископлих не судити никому же, судит их сам епископ. Первая тяжа роспуст; другая тяжа, аж водить кто две жоне; третьяя тяжа аще кто поимется чрес закон; а четвертая уволочская, аж уволочет кто девку, што возметь князь, с епископом наполы, или посадник что възметь свои тяжи, то с епископом наполы; а пятое, аж ту женку […] то епископу; шестая вопрос, а то епископу, зелья и душегубства тяжа епископля; семая аж бьетася две жене, то епископля тяжа; [аж] церковный человек дойдет чего, то своему епископу; девятая аж кого бог отведет церковных людей, а не будет зла ничего церкви.

7. Да се яз молъвлю и уставил есми епископью, поручен Смоленск богом и деднею и отцовою молитвою, да се яз князь Ростислав, с первым епископом своим Маноилом, да се уставляю яз. Аж будет или тяжа, или продажа епископля, да ненадобе ни князю, ни посаднику, ни тивуну, ни иному никому же от мала и до велика, и по всей 67 волости Смоленской. Се же ныне, с божьею помощью и со святою богородицею, в сии дни полны дани, а по сем что бог устроить; по божью строю чи которая дань оскудееть, или ратью, или коим образом, [п]о силе что почнеть давати тыи дани, а из того десятина святей Богородици.

Да сего не посуживаи никтоже по моих днех, ни князь, ни людие; аще ли кто посудить сея грамоты, что есми дал к святей Богородици, да той отвечает в страшныи день святей богородица, и сия клятва будеть на нем, а яз буду без греха…

9. [Се] яз, грешный сын Мьстиславль, надеяся на матерь божью на святую богородицу, уставляю сию епископью; даж кто разрушит ю, да сам отвечаеть святей богородици, и сия клятва святых отец буди на нем, а яз буду без греха.

ГРАМОТА ВЕЛИКОГО КНЯЗЯ МСТИСЛАВА ВЛАДИМИРОВИЧА И СЫНА ЕГО ВСЕВОЛОДА НОВГОРОДСКОМУ ЮРЬЕВУ МОНАСТЫРЮ НА СЕЛО БУЙЦЫ, ПОЛЮДЬЕ И СЕРЕБРЯНОЕ БЛЮДО 1125–1132 гг.

Се аз, Мьстислав Володимирь сын, дьржа Русьскую землю, в свое княжение повелел есмь сыну своему Всеволоду отдати [Буи]це святому Георгиеви с данию, и с вирами, и с продажами, [и вено во…кое]. Даже который князь по моемь княжении почьнеть хотети отъяти у святаго Георги [я, а] бог буди за темь и святая богородица, и тъ святыи Георгии у него то отимаеть. И ты, игумене [Исаие], и вы, братие, донеле же ся мир състоить, молите бога за мя и за мое дети, кто ся изоостанеть в манастыри, то вы темь дължьни есте молити за ны бога и при животе и в съмьрти. А яз дал рукою своею и осеньнее полюдие даровьное, полътретиядесяте гривьн святому же Георгиеви. А се я, Всеволод, дал есмь блюдо серебрьно в [30] гривн серебра святому же Георгиеви; велел есмь бити в не на обеде, коли игумен обедает. Да же кто запъртить или ту дань и се блю [до, да судит ему бог в день пришьствия с] воего и тъ св[ятыи Георгии].

ГРАМОТА ВЕЛИКОГО КНЯЗЯ ВСЕВОЛОДА МСТИСЛАВИЧА ЮРЬЕВУ МОНАСТЫРЮ НА ТЕРПУЖСКИЙ ПОГОСТ ЛЯХОВИЧИ 1125–1137 гг.

Сеаз князь великыи Всеволод дал есмь святому Георгию Терпужьскыи погост Ляховичи с землею, и с людьми, и с коньми, и лес, и борти, и ловища на Ловати, а по Ловати на Низ по конец Водоса за рекою за Любытиною по больший мъхи, с больших мхов на вьрх межьника, с того межьника на Каменичища на усть Березна, со обе стороны межьник ввьрх Березна, по обе стороны ввьрх Березна на вьрх Глистьныпо чистый мох, от Морее с вьрх Глистьне на вьрх Робьи Ильмны, с вьрх Робьи на вьрх Лебединьца, с вьрх Лебединьца на вьрх Възвада, с вьрх Възвада на вьрх Городьни, на низ по одной стороне до Робьи. А то дал есмь святому Георгию во векы. А хто поступить, судиться со мною перед Георгиемь в сии век и в будущий.

ГРАМОТА ВЕЛИКОГО КНЯЗЯ ИЗЯСЛАВА МСТИСЛАВИЧА НОВГОРОДСКОМУ ПАНТЕЛЕЙМОНОВУ МОНАСТЫРЮ 1146–1155 гг.

Се аз князь великий Изяслав Мьстиславич по благословению епискупа Нифонта испрошал есмь у Новагорода святому Пантелемону землю село Витославлицы и смерды и поля Ушково и до прости. А завод той земли от Юрьевьской орамицы простью вверх, и с прости возли Ушковскую орамицу по верхней стороне да направо в лог, логом по верховью Мячина и Мячином вниз по вешную воду к Добрыне улицы к образу святому, и от Добрыне улицы Мячином вверх подле рель да налево в Великий ручей, ручьем вверх подли княжую рель до Юрьевского межника, что крест стоит под межником, от Юрьевского межника логом подле Юрьевскую рель, да подле Юрьевскую орамицу логом да по конец логу промеж орамицы Юрьевской и Ушкова поля да в прость. И устроил есми святому Пантелемону монастырь и посадил есми 69 в нем игумена Аркадия. Аболе в тую землю, ни в пожни, ни в тони не вступатися ни князю, ни епискупу, ни болярину, ни кому. А хто ловит рыбу, доложа игумена. А смердам витославлицам не потянути им ни ко князю, ни к епискупу, ни в городцкии потуги, ни к смердом ни в какии потуги, ни иною вивирицою, а потянути им ко святому Пантелемону в монастырь к игумену и к братьи. А хто почнет вступатися в тую землю, и в воду, и в пожни или князь, или епискуп, или хто имет силу деяти, и он во второе пришествие станет тяжатися со святым Пантелемоном.

ДУХОВНАЯ АНТОНИЯ РИМЛЯНИНА (НЕ ПОЗДНЕЕ 1147 Г.)

Се яз, Антонии, хужши во мнисех, изыдох на место сее, не приях и имения ото князя ни от епискупа, но токмо благословение от Никиты епискупа. И паша по чюжеи земле ни вдвое ни воедино, ни себе покоя не дах, и братьи и сиротам и зде крестьяном досажая. Да то все управит мати божия, что есмь беды принял о месте сем. А се поручаю богу и святей богородицы и крестьяном, и даю в свободу, и се поручаю место се на игуменство. Хто мое слово худое преступит, судит ему бог и святая богородица или бог отведет. А кого изберут братья, но от братьи, и иже кто в месте сем терпит. А которой брат наш да от места сего начнет хотети игуменства или мздою или насильем, да будет проклят; или ото князя начнет по насилью деяти кому или по мзде, да будет проклят; или епискуп по мзде начнет кого ставити, илиин станет насильством творить на месте сем, да будет проклят. И се возвещаю: да егда седох на месте сем, дал есмь на земле и на тони семдесят гривен, на селе есмь дал гривен сто на Волховском, Тудоре з женою и з детми одерень, Волос з женою и з детми одерень, Василеи з женою и з детми одерень. Аще сию грамоту хто преступит, да будет проклят треми сты святых отец и осмьюнадесят и буди ему со Июдою причастье.