Чтение онлайн

Канон [49]

глас 4

Песнь 1

Ирмо́с: Мо́ря чермну́ю пучи́ну [50] невла́жными стопа́ми дре́вний пешеше́ствовав Изра́иль, крестообра́зныма Моисе́овыма рука́ма Амали́кову [51] си́лу в пусты́ни победи́л есть.

Припе́в: Святы́й великому́чениче Фео́доре, моли́ Бо́га о нас.

М у́ченик, я́ве светлостьми́ украша́емь, Добротво́рцу предстои́ши Христу́, от Него́ удобря́емь, я́ко даро́в тезоимени́т Боже́ственных, му́чениче Фео́доре.

Припев: Святый великомучениче Феодоре, моли Бога о нас.

Б оже́ственными вооружи́вся, Фео́доре, ору́жии ве́ры, вра́жия ссекл еси́ тве́рдо душетле́нныя полки́, и победи́тель быв, с му́ченики венча́лся еси́.

С ла́ва: Све́тлое твоея́ души́ хра́брство показу́я злочести́вому, богому́дре, царю́, прему́дростию слове́с твои́х и благода́тию дел сего́ посрами́л еси́, Фео́доре.

И ны́не: Без се́мене О́тчею во́лею от Боже́ственнаго Ду́ха Бо́жия зачала́ еси́ Сы́на и Пло́тию родила́ еси́, И́же из Отца́ без ма́тере, нас же ра́ди из Тебе́ без отца́.

Песнь 3

Ирмос: Весели́тся о Тебе́ Це́рковь Твоя́, Христе́, зову́щи: Ты моя кре́пость, Го́споди, и прибе́жище, и утвержде́ние.

Припев: Святый великомучениче Феодоре, моли Бога о нас.

О полче́ние злочести́вое, я́ко воево́да си́лен, победи́л еси́ и стропти́ваго зми́я вся хи́трости попра́л еси́.

Припев: Святый великомучениче Феодоре, моли Бога о нас.

Я́ко усе́рден душе́ю, умышле́нием благочести́вым, сла́вне, злочести́вых погуби́л еси́ прелюбоде́йственная чти́лища*.

С лава: Кре́постию по́мысла лю́тых наноше́ния претерпе́л еси́, животво́рней ме́ртвости Подвигополо́жника подо́бяся.

И ныне: Ты еди́на су́щим на земли́, па́че естества́ благи́х Хода́таица, Ма́ти Бо́жия была́ еси́. Те́мже Ти, ра́дуйся, вопие́м.

Г о́споди, поми́луй. (Трижды.)

Сед а́ лен

глас 8

Б оже́ственное всеору́жие восприи́м и и́дольскую лесть низложи́в, А́нгелы возста́вил еси́ восхвали́ти по́двиги твоя́, и́бо, Боже́ственною любо́вию ум распали́в, на о́гненную смерть до́блественно дерзну́л еси́. Те́мже тезоимени́тно прося́щим тя дае́ши Боже́ственная дарова́ния, страстоте́рпче Фео́доре. Сего́ ра́ди вопие́м ти: моли́ Христа́ Бо́га грехо́в оставле́ние пода́ти чту́щим любо́вию па́мять твою́.

С лава, и ныне: В напа́сти многоплете́нныя впад от враг ви́димых и неви́димых, бу́рею одержи́м безчи́сленных согреше́ний мои́х, и я́ко к те́плому заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, из Тебе́ Воплоще́нному безсе́менно моли́ся приле́жно о всех рабе́х Свои́х, непреста́нно моля́щих Ти ся, Богоро́дице Пречи́стая, моля́щи Его́ при́сно согреше́ний оставле́ние дарова́ти воспева́ющим досто́йно сла́ву Твою́.

Песнь 4

Ирмос: Вознесе́на Тя ви́девши Це́рковь на Кресте́, Со́лнце Пра́ведное, ста в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Святый великомучениче Феодоре, моли Бога о нас.

У язви́л еси́ зми́я, уязви́ти тя хотя́щаго, и терпели́выми сопротивле́нии му́ченик яви́лся еси́, поя́ приле́жно тя Укре́пльшему: сла́ва си́ле Твое́й, Го́споди.

Припев: Святый великомучениче Феодоре, моли Бога о нас.

И знури́в плоть мно́гими ра́нами, по́мысл непрекло́нен поста́вил еси́, треблаже́нне, поя́ усе́рдно тя Укре́пльшему: сла́ва си́ле Твое́й, Го́споди.

С лава: Украси́лся еси́ страда́ньми Влады́ки, твоя́ честна́я страда́ния, прему́дре, совоку́пль, и сподо́бился еси́ Того́ све́тлости и жела́емыя красоты́.

И ныне: Неискусобра́чно родила́ еси́, о Де́во, и по Рождестве́ яви́лася еси́ де́вствующи па́ки. Те́мже немо́лчными гла́сы, е́же ра́дуйся, Тебе́, Влады́чице, ве́рою несумне́нною взыва́ем.

Песнь 5

Ирмос: Ты, Го́споди мой, Свет в мир прише́л еси́, Свет Святы́й, обраща́яй из мра́чна неве́дения ве́рою воспева́ющия Тя.

Припев: Святый великомучениче Феодоре, моли Бога о нас.

К ропле́нием плотски́х крове́й уста́вил* еси́ де́монскую на па́губу приноси́мую кровь, непобеди́ме Фео́доре.

Припев: Святый великомучениче Феодоре, моли Бога о нас.

О нра́ва благочести́ва! О до́блественна ра́зума! О ве́ры тепле́йшия честна́го страстоте́рпца, е́юже Бо́га получи́!

С лава: Ум име́я све́том Бо́жиим осия́емь, побо́рника зло́бы омрачи́л еси́, зми́я, богоно́се Фео́доре.

И ныне: Тя ору́жие непобеди́мое на враги́ предлага́ем, Тя утвержде́ние и наде́жду на́шего спасе́ния, Богоневе́сто, стяжа́хом.

Песнь 6

Ирмос: Пожру́* Ти со гла́сом хвале́ния, Го́споди, Це́рковь вопие́т Ти, от бесо́вския кро́ве очи́щшися, ра́ди ми́лости от ребр Твои́х исте́кшею Кро́вию.

Припев: Святый великомучениче Феодоре, моли Бога о нас.

П обеди́л еси́ усе́рдием де́рзостным низлага́ющих, на кресте́ просте́рт и гвоздьми́ пробода́емь, блаже́нне, изобража́я спаси́тельную Страсть [52] Зижди́теля*.

Припев: Святый великомучениче Феодоре, моли Бога о нас.

З ако́нно стра́ждущему, Христо́с тебе́ явля́ется в темни́це затворе́ну, воздвиза́я я́ко Подвигополо́жник к по́двигом на враги́ боре́ния, пресла́вне.

С лава: Же́ртву чи́сту, и свя́ту, и непоро́чну тебе́ ра́ди во́лею Себе́ же́ртву прине́сшему, приве́л еси́ себе́, страстоте́рпче Фео́доре.

И ныне: О чу́до, всех чуде́с нове́йшее! Я́ко Де́ва, во утро́бе вся Содержа́щаго неискусому́жно заче́нши, не тесновмести́.

Г о́споди, поми́луй. (Трижды.)

С ла́ва Отцу́ и Сы́ну и Свято́му Духу и ны́не, и при́сно, и во ве́ки веко́в. А ми́нь.

Конд а́ к

глас 2

М у́жеством души́ в ве́ру оболки́йся и глаго́л Бо́жий, а́ки копие́, в ру́ку взем, врага́ победи́л еси́, му́чеников преве́лий Фео́доре, с ни́ми Христу́ Бо́гу моля́ся не преста́й о всех нас.

И́кос С трада́льцев пресве́тлую добро́ту, прииди́те вси, пе́сненными венцы́, ве́рнии, Фео́дора венча́ем: дар бо Бо́жий вели́к ми́ру яви́ся сия́ньми чуде́с. Врага́ бо побе́ждь велиа́ра* страда́нии честны́ми, одождя́ет вме́сто кро́вных ка́плей исцеле́ний то́ки, с си́ми у́бо все́ми

Песнь 7

Ирмос: В пещи́ Авраа́мстии о́троцы перси́дстей, любо́вию благоче́стия па́че, не́жели пла́менем опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Святый великомучениче Феодоре, моли Бога о нас.

В пещи́ твои́х по́двигов, му́чениче сла́вне, вещь злоче́стия попали́л еси́ и свети́ло благоче́стия, поя́, был еси́: благослове́н еси́ в хра́ме сла́вы Твоея́, Го́споди.

Припев: Святый великомучениче Феодоре, моли Бога о нас.

Я́ко воево́да, я́ко смы́слен и тре́звенник де́лом, царя́ несмы́слена и злочести́ва премо́гл еси́ и показа́л еси́ сего́ некре́пка, укрепи́вся си́лою духо́вною.

С лава: Зако́н побежда́ется похвала́ми вели́чества твоего́: ты бо пресве́тлыми просия́л еси́ облиста́нии муче́ния, Влады́це твоему́ вопия́, Фео́доре: благослове́на держа́ва Твоего́ влады́чества.

И ныне: Вы́шняго освяще́нное Боже́ственное селе́ние, ра́дуйся, Тобо́ю бо даде́ся ра́дость, Богоро́дице, зову́щим: благослове́на Ты в жена́х еси́, Всенепоро́чная Влады́чице.

Песнь 8

Ирмос: Ру́це распросте́р, Дании́л львов зия́ния* в ро́ве затче́*; о́гненную же си́лу угаси́ша, доброде́телию препоя́савшеся, благоче́стия рачи́тели о́троцы, взыва́юще: благослови́те вся дела́ Госпо́дня, Го́спода.

Припев: Святый великомучениче Феодоре, моли Бога о нас.

Н а Тя упова́в, мене́ ра́ди Крест и смерть претерпе́вшаго, на крест воздвиго́хся, Влады́ко, и уязвля́емь стреля́ньми, и лю́тым прикаса́яся ра́нам, Го́споди, вопия́л еси́, му́чениче, стражда́, доблему́дренне Фео́доре.

Припев: Святый великомучениче Феодоре, моли Бога о нас.

П риве́л еси́ же́ртву чи́сту себе́ Зижди́телю твоему́, ра́дуяся, Фео́доре, и отлучи́вся, сла́вне, к Ца́рству Небе́сному, с му́ченики свяще́нно взыва́я всегда́: благослови́те вся дела́ Госпо́дня, Го́спода.

С лава: Я́ко крин, я́ко ши́пок* разу́мный, воня́ми страда́ний твои́х благоуха́еши нас, отгоня́ благода́тию всегда́ злосмра́дие страсте́й на́ших и понужда́я вопи́ти благово́нною душе́ю: благослови́те вся дела́ Госпо́дня, Го́спода.

И ныне: Ты еди́на во всех роде́х, Де́во Пречи́стая, Ма́ти яви́лася еси́ Бо́жия, Ты Божества́ была́ еси́ жили́ще, Всенепоро́чная, не опа́льшися огне́м непристу́пнаго Све́та. Те́мже вси Тя благослови́м, Мари́е Богоневе́сто.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся, Христо́с, совокупи́вый разстоя́щаяся естества́. Тем, веселя́щеся, Тя, Богоро́дице, велича́ем.

Припев: Святый великомучениче Феодоре, моли Бога о нас.

Н ы́не со блаже́нными собо́ры и му́ченическими ли́ки, я́ко укра́шен страда́ньми, соводворя́яся и свеселя́ся, вене́ц нося́, предстои́ши Жела́емому тебе́, Фео́доре.

Припев: Святый великомучениче Феодоре, моли Бога о нас.

К высоте́ Небе́сней взя́тся, о земны́х небре́г, и жела́емаго тебе́ конца́ сподо́бился еси́, то са́мое соверше́ние жела́ний, Фео́доре, восприе́м, ра́дуяся.

Припев: Святый великомучениче Феодоре, моли Бога о нас.

И мы́й к Бо́гу дерзнове́ние, я́ко добль и мудр страда́лец, восхваля́ющим тя любо́вию согреше́ний оставле́ние проси́, от страсте́й и скорбе́й всех нас избавля́я.

С лава: Еди́наго Тя, Безсме́ртна Сло́ва, пло́тию пострада́вша и уме́рша, му́ченик богому́дрый возжела́в, безсме́ртия Твоего́ получи́в, на Небеса́ всели́ся, к Зижди́телю всех Всеси́льну.

И ныне: Благослове́нную Мари́ю и Бо́жию Ма́терь Де́ву, прииди́те вси, ве́рою и любо́вию непреста́нно восхва́лим, Ея́же ра́ди обре́тше ве́чное ра́дование.